Søknad om løyve til handtering av forureina sediment

P.S. Windegaard søkjer, på vegner av J.J. Ugland AS/ AS NYMO, om løyve til handtering av forureina sediment i samband med forlenging av noverande kai og bygging av ny kai i Vikkilen i Grimstad. Utvidinga av kaiareala er grunngitt med endra driftsbehov.

Tiltaka omfattar:

• Forlenging av noverande kai frå 90 til 130 meter
• Bygging av ny kai på 60 meter ved Gjømle

Ved forlenging av noverande kai, skal forureina sediment dekkjast til. I området der det skal byggjast ny kai, er det behov for mudring og sprenging av fastfjell under vatn. Utanfor ny kai skal forureina sediment dekkjast til ned til 15 meter.

Vikkilen er svært forureina av miljøgifta tributyltinn (TBT) som tidlegare vart brukt som botnstoff på skip. J.J. Ugland AS/ AS NYMO meiner at tiltaka vil vere eit steg på vegen til å oppnå betra økologisk status i Vikkilen ved at forureina sediment blir fjerna eller dekte av reine overskotsmassar. Forureina massar er planlagd levert til godkjent deponi, i første rekkje Langøya.

Fullstendig søknad med vedlegg er også lagt ut ved Servicesenteret i Rådhuset i Grimstad. Eventuelle merknader må sendast Statens forureiningstilsyn, Postboks 8100 Dep, 0032 Oslo innan fire veker frå 27.april.