Kunngjering

Søknad om løyve til oppstart av brønnar mot Ormen Lange Landanlegg i 2012.

A/S Norske Shell har i brev av 29. mars 2012 søkt Klima- og forureiningsdirektoratet (Klif) om løyve til oppstart av brønnar på Ormen Lange-feltet mot landanlegget på Nyhamna også i 2012. Dette medfører ein auke i mengda bore- og brønnkjemikal som blir ført i land og behandla på Nyhamna, og eventuell bruk og utslepp av emulsjonsbrytar dersom det blir danna emulsjonar i separasjonsanlegget på Nyhamna. Metoden Norske Shell søkjer om å bruke, blei teken i bruk på Ormen Lange-feltet på to brønnar i 2010 og tre brønnar i 2011. Operasjonen i 2012 omfattar tre brønnar frå brønnramme C. Brønnane vil bli starta opp i serie i månadsskiftet september/oktober.

Noverande metode – oppstart av brønnar til rigg

Norske Shell har løyve til bruk og utslepp av kjemikal på Ormen Lange-feltet i samband med brønnoppstartsoperasjonar, det vil seie oppstart av brønnar til rigg. Med denne metoden mottek produksjonssystemet på Nyhamna berre restar av brønnvæskene frå brønnsoppstartsoperasjonane. Noko brønnvæske går også tapt i formasjonen.

Metoden det er søkt om – oppstart av brønnar til land

Norske Shell ønskjer også for 2012 å nytte ein alternativ metode for oppstart av brønnar på Ormen Lange-feltet. Metoden blir kalla ”oppstart av brønnar til land”. Med denne metoden blir brønnane opna direkte mot land, det vil seie at brønnstraumen (hydrokarbon og brønnvæske) blir leidd utanom riggen og via transportrørleidningen til Ormen Lange Landanlegg. Behandling av brønnvæske vil da skje på Nyhamna.

Norske Shell forventar at 483,8 tonn brønnkjemikal vil kome til Ormen Lange Landanlegg i samband med oppstart av dei tre brønnane i 2012.  Brønnopninga i 2012 omfattar også rørleidningskjemikal, totalt 994,2 tonn.

Ifølgje Norske Shell viser resultata frå miljøovervakinga i 2010 og 2011 at det er låg miljørisiko i samband med oppstart av brønnar til land. Resultata frå økotekstesting av avløpsvatnet under oppstart av brønnar i 2010 og 2011, viser lågt innhald av giftige komponentar. Norske Shell planlegg å overvake brønnoppstarten i 2012, tilsvarande som for 2010 og 2011, det vil seie uttak av prøver både før, under og etter brønnoppstart.

Oppmoding om fråsegner

Søknaden frå A/S Norske Shell er lagt ut til offentleg innsyn i kommunehuset på Falkhytten i Aukra kommune. Saksdokumenta og skjema for å gi elektronisk tilbakemelding finn du på desse sidene (http://www.klif.no/horing2011-94). Det er også mogeleg å sende inn høyringskommentarar skriftleg til Klima- og forureiningsdirektoratet, postboks 8100 Dep, 0032 Oslo

Fristen for høyringsfråsegner er 18. juni 2012.