Kunngjering

Søknad om løyve til fjerning av deponi A og tiltak i sjø utanfor kai ved Jotuns anlegg på Manger.

Jotun har søkt Klima- og forureiningsdirektoratet om løyve til fjerning av deponi A og tiltaksløysing i sjø utanfor kai ved Jotuns anlegg på Manger i Radøy kommune.

Deponi A er delvis fylt ut i eit vatn/tjern inne på bedriftsområdet, har eit anteke areal på inntil 1400 m2 og ei mektigheit på inntil 6 meter. Deponiet inneheld ei blanding av mineralske fyllmassar, torv/jord og forskjellige fraksjonar avfall (blant anna tønner, trevirke, glas, plast og annan emballasje, samt maskindelar). Arbeidet omfattar graving i sterkt forureina massar, som delvis er fylt ut i vatnet/tjernet. Alle forureina massar og alt avfall i deponi A skal fjernast frå tomta og leverast til godkjent mottak. Både før saneringa startar, og undervegs, vil det bli utført tiltak for å redusere faren for spreiing av forureining til sjø og til allereie sanerte område i samband med gravearbeidet. Fjerning av deponiet vil i ein anleggsfase kunne føre til auka risiko for spreiing av forureining, men vil i eit lengre perspektiv føre til ei vesentleg forbetring av miljøet lokalt. Arbeida er planlagde gjennomført våren 2013.

Det er planlagt tiltak i sjø utanfor anlegget. Tiltaksområdet er på totalt ca. 7 daa og er fordelt på tre delområde. I det planlagde tiltaksområdet er sedimenta forureina av kvikksølv, bly, kobbar, PCB og PAH. Totalt mudringsvolum er vurdert til 2300 m3. Jotun vurderer mudring som den beste tiltaksmetoden, og mudringsmassene vil bli deponert i eksternt deponi. Per i dag er start av tiltaket planlagd hausten 2013, og ut frå området sin storleik og mudringsvolum antek ein at anleggsperioden vil være på 2,5 til 3 månader. Det vil bli sett i verk tiltak for å hindre spreiing av forureining under arbeida, overvaking mens arbeida varer og prøvetaking av attverande sediment etter at tiltak er gjennomført for å verifisere at måla i tiltaksplanen er oppnådde. Mål for tiltaket er at gjennomsnittlege konsentrasjonar av miljøgiftene bly, kobbar, kvikksølv, TBT, PCB og PAH i det bioaktive laget av attverande botnsediment (0-10 cm) ikkje skal overskride tilstandsklasse II.

Vanlegvis er det Fylkesmannen som er myndigheit for søknader om mudring og dumping. Klif har valt å behandle både søknaden om fjerning av forureina massar og mudring på land og i sjø utanfor anlegget. Desse sakene er baserte på den same kunnskapen om bedrifta, og vi vurderer det derfor som formålstenleg at vi også behandlar søknadene om mudring.

Søknaden og skjema for elektronisk tilbakemelding ligg på desse sidene (http://www.klif.no/horing2011-280). Det er også mogeleg å sende inn høyringskommentarar skriftleg, med referansenummer 2011/280 til Klima- og forureiningsdirektoratet, Postboks 8100 Dep, 0032 Oslo.

Søknaden er lagd ut til offentleg innsyn ved Radøy kommune på Rådhuset, Radøyvegen 1690, 5936 Manger. Vi ber om at eventuelle fråsegner til søknaden blir sende Klima- og forureiningsdirektoratet innan 12.04.2013.