Kunngjering

Søknad om endring av løyve til verksemd etter forureiningslova for Ormen Lange Landanlegg.

Etter lov om vern mot forureiningar og om avfall av 13. mars 1981 nr. 6, har A/S Norske Shell ved brev datert 29. januar 2013 søkt Klima- og forureiningsdirektoratet (Klif) om endring av løyve til verksemd etter forureiningslova for Ormen Lange Landanlegg. Søknaden omfattar landanlegget og aktivitetar offshore. Norske Shell søkjer om blant anna følgjande endringar:

Endring av utsleppsgrensa for metan (CH4) og nmVOC – diffuse utslepp
Verifikasjonsmålingar av diffuse utslepp til luft viser at Ormen Lange Landanlegg overskrid utsleppsgrensene som er fastsette i løyvet av 4. juni 2007. Resultata frå utsleppsmålingane gir høgare utsleppsverdiar enn det som var venta i den opphavlege søknaden frå 2005. Dei omsøkte utsleppa blei den gongen berekna basert på simuleringar. Norske Shell vurderer dei omsøkte utsleppa i den opphavlege søknaden om løyve til verksemd etter forureiningslova for ikkje å vere korrekte, og søkjer på denne bakgrunnen om endring av utsleppsgrensa for metan frå 120 tonn/år til 950 tonn/år og for nmVOC frå 360 tonn/år til 670 tonn /år. Nye verifikasjonsmålingar er planlagd gjennomførte i 2013.

Mellombels endring av utsleppsgrensene for NOX for varmoljeomnar
Feil ved kjelane har gjort at det ikkje har vore mogeleg å overhalde utsleppsgrensene i gjeldande løyve. Norske Shell har sett i gang ein studie som ser på mogelege løysingar. Det er forventa at reparasjonsarbeidet vil bli sett i gang i løpet av 2013. Norske Shell søkjer om mellombels endring av utsleppsgrensene for NOX for varmeoljeomnar frå 7,5 til 17,2 tonn/år.

Endring av grense for utslepp av kjølevatn og tilførd varmemengd
Norske Shell søkjer om endring av grensa for utslepp av kjølevatn frå 14 400 m3/time til maksimalt 25 500 m3/time, og grensa for tilførd varmemengd frå 175 MW til 185 MW. Auken er knytt til drift av anlegget og testbassenget for undervasskompresjon i perioden 2012–2014.

Endring av metode for fastsetjing av temperaturen i kjølevatnutsleppet
Ved bygging av Ormen Lange Landanlegg, blei det ikkje installert utstyr for online overvaking av temperaturen i kjølevatnutsleppet som opphavleg planlagt. Temperaturovervakinga har til no vore basert på berekningar. Norske Shell søkjer om å få nytte alternativ metode, det vil seie berekningar for fastsetjing av temperaturen i kjølevatnutsleppet.

Mellombels endring av grensene for utslepp av trietylenglykol (TEG) til sjø
Norske Shell søkjer om mellombels endring av utsleppsgrensene for TEG frå 1,5 til 3 mg/l og frå 330 til 660 kg/år inntil ny analysemetode for fastsetjing av TEG i avløpsvatnet er på plass. Ifølgje Norske Shell vil det i løpet av ein toårs periode utviklast ein ny analysemetode.

Kjemikalutslepp offshore
I samband med planlagde operasjonar på brønnrammene offshore (blant anna vedlikehaldsoperasjonar), vil det vere utslepp av kjemikal til sjø. Norske Shell søkjer om løyve til utslepp av kjemikala monoetylenglykol (MEG) og sitronsyre i Klifs grøne kategori (høvesvis 2 tonn og 62 kg/år), og utslepp av hydraulikkvæske med stoff i raud og gul kategori (høvesvis ca. 16,4 kg og 6,6 tonn/år).

Søknaden frå A/S Norske Shell er lagt ut til offentleg innsyn i kommunehuset på Falkhytten i Aukra kommune. Saksdokumenta og skjema for å gi elektronisk tilbakemelding finn du på desse sidene (http://www.klif.no/horing2011-94-2). Det er også mogeleg å sende inn høyringskommentarar skriftleg til Klima- og forureiningsdirektoratet, postboks 8100 Dep, 0032 Oslo. Vi ber om at eventuelle fråsegner til søknaden blir sende innan 10. april 2013. Partar i saka vil bli informert om Klima- og forureiningsdirektoratet si avgjerd.