Norge underteikna i 1999 Gøteborgprotokolle om å redusera utsleppa i Norge av svoveldioksid (SO₂), nitrogenoksider (NO_X), flyktige organiske forbindelser (NMVOC) og ammoniakk (NH₃). Avtalen hører inn under Konvensjonen for langtransporterte luftforureiningar (LRTAP) under FN sin økonomiske kommisjon for Europa (UNECE). I rapporten presenterer SFT tiltak for å redusera utsleppa av SO₂ ned til 22.000 tonn innan år 2010.

SO₂ gir sur nedbør som fører til skadar på fisk og dyr i vatn og vassdrag, og gjer materialskadar. SO₂ medverkar til danning av sekundær partiklar som sjølv i låge konsentrasjonar kan gi alvorlege helseskadar. Oppfylling av Gøteborgprotokollen for alle land som er omfatta av avtalen, vil redusera arealet med overskridingar av naturen si tolegrense for forsuring med om lag 70 prosent i høve til 1990. Likevel vil tolegrensene framleis vera overskridne på 7-8 prosent av arealet i Norge.

Rapporten er skrive for å gi bidrag til arbeidet med val av verkemidlar for å oppfylla Gøteborg-avtalen. Tilsvarande tiltaksanalysar er laga for NO_X, NH₃, NMVOC og klimagassar.

70 tiltak til 66 millionar kroner

Tiltaksanalysen omfattar 70 ulike tiltak. Tiltaka som er inkludert i analysen omfattar 80 prosent av framskrive SO₂-utslepp i 2010.

SFT har berekna samfunnsøkonomisk årleg meirkostnad for å redusera SO₂-utsleppet frå framskrive utsleppsnivå i år 2010 på 29.000 tonn og ned til 22.000 tonn til om lag 66 millionar kroner. Kostnaden for det siste og dyraste tiltaket er da om lag 14 kr per kilo redusert SO₂-utslepp. Tiltaka som her er rekna å vera mest kostnadseffektivt å gjennomføra, er i hovudsak innanfor metallindustrien, samt enkelte tiltak på større fyringsanlegg.

Rapporten illustrerar også effekten av å inkludera i kostnadsberekningane miljønytten i form av redusert forsuring, materialskadar og helseskadar knyta til å redusera norske SO₂-utslepp i Norge. Desse berekningane gir ein årleg samfunnsøkonomisk meirkostnad på vel 20 millionar kroner.

Rådata frå 30 bedrifter

Alle tiltak og bedrifter som det kan vera aktuelt å gjennomføra tiltak i for å redusera SO₂-utsleppet i Norge, er ikkje inkludert i denne analysen. Analysen peikar difor ikkje på kva bedrifter som kan komma til å måtta redusera SO₂-utsleppa, men han gir eit godt bilete på kva kostnader som er knyta til å redusera SO₂-utsleppa.

Rapporten er skrive av SFT på oppdrag frå Miljøverndepartementet. Rådata til tiltaksvurderingane i rapporten er henta inn frå 30 bedrifter i Norge som i dag har høge SO₂-utslepp og frå Vegdirektoratet. Vurderingar og konklusjonar i rapporten står eine og aleine for SFT si rekning.