I samband med statleg program for forureiningsovervaking av Sørfjorden og Hardanger i 2001 samla Norsk institutt for vannforskning (NIVA) inn blåskjellprøver frå seks stasjonar i september. Desse blei analyserte for PCB. Prøvene viste at konsentrasjonane av PCB i blåskjell var fleirdobla i høve til tidlegare år. Frå Tyssedal var verdiane spesielt høge.

For å få stadfest resultata blei det også analysert blåskjell samla inn i desember. Desse resultata stemde godt med dei tidlegare målingane.

PCB-lekkasje

Sidan auken er så dramatisk, er det truleg at det er ei aktiv PCB-kjelde i området Tyssedal-Lindenes. Fylkesmannen i Hordaland skal koordinere arbeidet med å finne kjelda og få stogga lekkasjen.

Kosthaldsråd

Statens næringsmiddeltilsyn (SNT) har tidlegare gitt kosthaldsråd for Sørfjorden på grunn av kvikksølv i fisk og kadmium og bly i skjell. SNT frårår difor å ete skjell frå området. Ein bør heller ikkje ete torsk meir enn ein gong i veka frå indre Sørfjorden (innanfor Måge). Gravide og ammande bør ikkje ete fisk og skaldyr fanga i Sørfjorden.

Det er ikkje analysert for PCB i prøver av fiskelever frå Tyssedal, men SNT frårår konsum av fiskelever frå indre Sørfjorden (innanfor Måge) fram til nye analysedata av torskelever er klar.