Våren 2002 vart det avdekt at store mengder farleg avfall kvart år hamnar på avvegar. Reinseri- og vaskeribransjen vart identifisert som ein av fleire bransjar med eit klart forbetringspotensial. SFT synest det er gledeleg at bransjen såpass raskt har teke grep for å rydde opp i handteringa av det farlege avfallet.

Auka innsamling

– Avtala kan gjere at fleire aktørar knyter seg til ei innsamlingsordning, sånn at større mengder avfall blir samla inn og teke hand om på forsvarleg vis. Avtala viser at bransjen tek miljøansvaret sitt på alvor, seier Håvard Holm.

Lettare for bedrifta å levere inn

Avtala legg opp til eigne køyreruter for Norsk gjenvinning si innsamling av avfall frå medlemsreinseria i Norsk renseri- og vaskeriforbund (NRV). Medlemsbedrifta kan vidare få levert anna avfall som plast, papp og emballasje. I tillegg kan bedrifta få assistanse med utfylling av deklarasjonsskjema, årlege rapportar over levert mengd og tilgang til Norsk gjenvinning sitt kvalitetssystem for avfallshandtering.

Samarbeid mellom bransje og styresmakter

SFT og NRV har hatt møte for å diskutere korleis ein kan få til auka innlevering av farleg avfall i reinseri- og vaskeribransjen. På bakgrunn av dette er det utarbeidd rettleiingsmateriell og faktaark om spesifikke avfallstypar for bransjen og kva for plikter den enkelte bedrifta har. SFT har tilsvarande samarbeid med andre bransjar.