CCA-impregnert trevirke inneheld arsen-, krom- og kobbarsamanhengar. Når ein brenn slikt trevirke, vil både røyken og oska kunne innehalde arsenikk.

Ulovleg sal

I 2002 blei det forbode å selje trevirke impregnert med krom og arsen til forbrukarar, men SFT har ved kontrollar av byggjevare- og hagesenter i sommar oppdaga at CCA-impregnert trevirke framleis blir tilbode forbrukarane. Derfor kan det også hende at du har kjøpt dette trevirket nyleg. Det er ingen enkel måte å sjå forskjell på trevirke som er CCA-impregnert og anna impregnert trevirke.

- Vi har oppdaga at CCA-impregnert trevirke fleire stader ikkje er merka riktig, og ikkje er formålstenleg plassert i forhold til at dette ikkje er ei forbrukarvare, seier seksjonssjef i SFT, Cecilie Kristiansen.

Miljøskadelege stoff

Du kan framleis få kjøpt impregnerte trevirke tilsikta forbrukarar, men det er sett inn med andre typar stoff, som for eksempel kobbar. Brenning av denne typen impregnert trevirke er likevel framleis miljøfarleg.

- Eit godt råd er derfor å unngå all brenning av impregnert trevirke, anten det er gammalt eller nytt, seier Kristiansen.

Heller ikkje plast, gamle sofaer, vindaugskarmar eller hagemøblar bør brennast. Brenning av avfall kan gjere at det oppstår giftige gassar og vere forureinande. St. Hans-bålet bør berre fyllast opp med reint og tørt trevirke.