Endringane i forureiningsforskrifta inneber også at fylkesmennene får moglegheit til å krevje gebyr for å gjennomføre kontrollar av føretak med løyve. Endringsforslaga følgjer av at forureiningsmyndigheitene sidan desember 2000 har delegert mykje ansvar til fylkesmennene.

Forureinar skal betale

- Til grunn for endringsforslaga ligg måla om at staten skal kunne dekke inn utgiftene knytt til arbeidet med ulike løyve og kontrollar og prinsippet om at forureinar skal betale, seier direktør Marit Kjeldby i miljøoppfølgingsavdelinga i SFT.

Gebyr for kontrollar av verksemd

Om forslaga går gjennom, får SFT og fylkesmennene også høve til ta gebyr for kontrollar av verksemd som er omfatta av forureiningsforskrifta, avfallsforskrifta og forskrifta om systematisk helse-, miljø- og tryggleiksarbeid i verksemder. Alle desse forskriftene har heimel i forureiningslova. 

- SFT meiner det er unaturleg og lite heilskapleg at gebyrplikta er avhengig av forvaltningsnivået og reguleringsforma, seier Marit Kjeldby.

Slepp gebyr

Mange føretak som tidlegare måtte betale gebyr for å få si sak handsama av SFT, eller for at SFT skulle gjennomføre kontrollar, slepp no slike gebyr fordi det er fylkesmennane som handsamar sakene deira i dag.

Høyringsfrist 2. mai

SFT ber om at kommentarar til høyringsutkasta vert sendt til SFT innan 2. mai 2006.