1. januar 2006 vart det innført miljøavgift på all drikkevareemballasje. SFT godkjenner returgrad for innsamla emballasje og Toll- og avgiftsdirektoratet (TAD) vedtek tilsvarande reduksjon av miljøavgifta. Det vil ta noko tid før Tine BA kan dokumentere returgrad for skulemjølkkartongar og SFT vil få dokumentasjon frå meieriprodusenten i ettertid.

Surt for skulemjølka

Meieriprodusenten Tine BA synest miljøavgifta fell uheldig ut for skulemjølkordninga, men Finansdepartementet meiner det er opp til bransjen sjølv å lage returordningar som syt for at innsamlinga aukar tilstrekkeleg. Tine har derfor søkt SFT om eiga returordning for ordninga med skulemjølk.

Skyll, brett, stapp og returner

- Det er viktig at barn framleis skyller, brettar, stappar og returnerer dei tomme drikkekartongane. Avgifta vil falle heilt bort når Tine kan dokumentere at meir enn 95 prosent av emballasjen vert returnert, seier seksjonssjef Kari Aa i avfallsseksjonen i SFT.

Avgifta dekker kostnadane ved forsøpling

Tidlegare hadde mjølkeprodukt unntak frå miljøavgifta fordi desse produkta stort sett vart drukke heime og ikkje hamna som avfall i naturen. Endra produkt og drikkevaner har gjeve grunnlag for å innføre avgifta, som skal dekke kostnadane ved at slik emballasje no hamnar som søppel i naturen. Målet med avgifta er å få fleire til å brette, stappe og returnere dei tomme drikkekartongane.