Etter ein stikkprøvekontroll i mai sendte SFT 21 badeleiker til eit laboratorium i Noreg, som videresendte prøvene til eit akkreditert laboratorium i Tyskland. Deira analysar i juni synte at ftalat var brukt som mjuknar i to av dei 21 kontrollerte badeleikene. I etterkant kom det fram at laboratoriet hadde bytta om på to av prøvene.

SFT bestemte seg da for å kjøre nye analysar av produkta. Eit produkt der det først var funne forureiningar av ftalat var frikjend etter nye analysar, men dei andre produkta blei sendt til eit anna laboratorium i Tyskland som også er akkreditert for slike analysar.

To produkt framleis forbodne

Dei nye analysane av badeleikene stadfestar at to av produkta er ulovlege på den norske marknaden. I følgje importøren har ikkje desse produkta vore i sal sidan midten av mai.

Frifinn eit nytt produkt

I dei nye analysane er det ikkje funne ftalat i eit produkt som synte små forureiningar av ftalat over den tillatne grensa på 0,1 prosent i dei første analysane. Produktet kan derfor seljast i Noreg.

19 av 21 produkt funne i orden

Dei nye analysane stadfestar også at ingen av dei andre produkta SFT sendte til testing inneheld dei forbodne stoffa. Resultata syner at det er ei stor forbetring frå kontrollen i fjor da SFT fann ftalat i 15 av 18 kontrollerte badeleiker.