Forslaget til forskrift har vore på høyring og har fått brei støtte. Både kommunane og næringslivet meiner regelverket vil gi auka innsamling av farleg avfall, samtidig som det medverker til betre konkurranseforhold i byggje- og rivingsbransjen. Regelverket vil medverke til å forhindre at avfall som kan brytast ned hamnar på deponi og dermed fører til klimagassutslepp.

Hovudtrekka i SFT sitt forslag til regelverk står fast, men det er gjort nokre mindre presiseringar i forhold til det forslaget som gjekk på høyring. SFT sender nå forslaget til Miljøverndepartementet.

Må tilpassast plan- og bygningslova

SFT foreslår at det nye regelverket inntil vidare blir eit nytt kapittel i avfallsforskrifta, men at regelverket på sikt vert forankra i den nye plan- og bygningslova. For å sikre ein smidig prosess, er det naudsynt at regelverket blir tilpassa plan- og bygningslova før det blir vedteke endeleg av Miljøverndepartementet.

Må greie ut om miljøsanering

SFT foreslår at det blir stilt krav om at alle prosjekt som blir omfatta av den nye forskrifta må greie ut om miljøsaneringa. Dette skal sikre at farleg avfall blir kartlagt før sjølve rivingsarbeidet startar og at farleg avfall dermed ikkje hamnar i restavfallet. Eksempel på slik avfall er PCB-isolerglasruter og PCB-kondensatorar i lysarmatur. Det er også viktig å ta omsyn til at ikkje all gjenvinning er av det gode. Avfall med innhald av helse- og miljøfarlege stoff bør ikkje verte gjenvunne og resirkulert til andre bruksområde.

For trebygningar under 400 m2, er det laga eit forenkla skjema.

Avfallet skal sorterast

SFT foreslår framleis at det i regelverket vert stilt krav om minimum 60 prosent sortering av byggje- og rivingsavfallet. Samstundes får kommunane høve til å gi dispensasjon frå dette kravet om særlege forhold skulle tilseie det.