EU-kommisjonen har sett i gong arbeidet med å revidere anneks IV til REACH, som angjev stoff som er unntekne frå store delar av EU sitt kjemikalieregelverk.

Kriterium

Kriterium som må vere oppfylt for at stoff skal vurderast inkludert i anneks IV, blei vedtekne i EU 19.oktober 2007. I kriteria er det lagt til grunn at det må vere tilstrekkeleg informasjon om stoffa og at det er minimal risiko for helse- og miljøskader basert på eigenskapane til stoffa. Spesifikk bruk og påfølgjande eksponering er ikkje inkludert i kriteria.

Kort søknadsfrist

I perioden frå 22. oktober til 30. november 2007 kan norske verksemder (først og fremst norske industriorganisasjonar) levere inn søknad om stoff som bør takast inn på anneks IV, til SFT eller til ein av følgjande europeiske industriorganisasjoner: CEFIC, REACH Alliance og CONCAWE.

SFT eller industriorganisasjonane skal deretter innan 10. januar 2008 vurdere forslaga opp mot kriteria, og så sende forslag som tilfredsstiller kriteria til EU-kommisjonen for vidare handsaming.

Søknad på engelsk

Industriverksemder må sjølve vurdere om stoffa tilfredsstiller dei strenge kriteria før søknadene om inkludering i anneks IV, og om dei skal leverast til SFT eller nemnte industriorganisasjonar. Søknadene må skrivast på engelsk. Vedlagte skjema må vere fylt ut når søknadene blir levert.
(Skjemaet som skal nyttast ved desse søknadene, er gjevne i appendiks 2 i kriteria.)

Stram tidsplan

EU-kommisjonen har laga ein detaljert tidsplan for revisjon av anneks IV som skal sikre at revisjonen blir ferdig innan fristen 1.juni 2008.
(Sjå lenke til tidsplanen for revisjon av anneks IV.)