Etter at det for nokre år sidan vart kjent at fisken inneheld bromerte flammehemmarar får Klima- og forureiningsdirektoratet gjennomført årlege miljøundersøkingar i Mjøsa. Dette er ei gruppe miljøgifter som er tungt nedbrytbare i miljøet.

Ei av undersøkingane – som blir utført av Norsk institutt for vassforsking (NIVA) på vegner av SFT – følgjer utviklinga av miljøgifter i aure, lågåsild og krøkle.

Lagåre nivå av bromerte flammehemmarar

I den lokale laksefisken lågåsild vart det høgaste nivået av bromerte flammehemmarar registrert i 2002. Sidan den gong har dei årlege undersøkingane vist lagåre nivå. Aure har høgare nivå enn lågåsild, dei høgaste nivåa vart funne i 2004. Nivåa av bromerte flammehemmarar i aure har vore lågare dei to siste åra.

- Det er for tidleg å seie at det i åra framover vil bli mindre bromerte flammehemmarar i mjøsfisken, men det er gode nyheiter at nivåa ikkje har auka dei siste åra. Vi vil helde fram med å overvåke innhaldet av miljøgifter for å kunne konkludere om det blir mindre bromerte flammehemmarar i fisken i Mjøsa, seier SFT-direktør Ellen Hambro.

Kosthaldsråd på grunn av PCB og kvikksølv

Mattilsynet sine kosthaldsråd for fisken frå Mjøsa skuldast innhaldet av PCB og kvikksølv, ikkje innhaldet av bromerte flammehemmarar. Nivåa av PCB i fisken er lågare enn nivåa av bromerte flammehemmarar, men effekten av PCB er sterkare.

Det har vore analysert på PCB i lågåsild frå Mjøsa sidan 1970-talet, og sidan den gong er det ein betydeleg nedgong. For aure har vi resultat for PCB-nivåa sidan slutten av 1990-åra. Det kan vere betydelege forskjellar i konsentrasjonar av PCB både mellom ulike år og mellom fiskestorleikar. Derfor er det vanskeleg å konkludere med at nivåa av PCB i mjøsfisken har gått ned det siste tiåret.

Overvåkinga syner ei svak auke av kvikksølv i aure dei siste åra, men det er for tidleg å vurdere om dette er ei trend eller berre ein variasjon mellom ulike år.

Framleis overvaking av miljøgifter

Miljøvernmyndigheitene held fram arbeidet med å overvåke miljøgiftene i og til Mjøsa. Dette er eit ledd i handlingsprogrammet for kontroll med utslepp av miljøgifter til Mjøsa.