Faggruppa, som blir leidd av Klima- og forureiningsdirektoratet (Klif), skal i løpet av 2011 utgreie miljøkonsekvensar av menneskeleg aktivitet og påverknad i havområdet. Fyrste fase i denne utgreiingsprosessen er å fastsetje utgreiingsprogram for arbeidet. Forslag til slike utgreiingsprogram blei lagt ut til høyring 1. oktober, med frist for innspel 3. januar 2011. For å sikre tidleg medverknad, arrangerte faggruppa eit ope høyringsmøte tysdag 30. november. Endeleg program for utgreiingane blir fastsett i starten av februar 2011, basert på innkomande høyringsinnspel.

Fullt hus: Over 80 personer var til stades under høyringsmøtet på Rica Helsfyr hotell i Oslo. Foto: Klif. 

Brei interesse

Deltakarane representerte eit breitt spekter av miljøforvaltarar, næringsinteresser, miljøorganisasjonar og forskingsinstitusjonar. Faggruppa presenterte forslaget sitt til utgreiingsprogram for petroleumsverksemd, alternativ energiproduksjon, fiskeri, skipsfart, land- og kystbasert aktivitet, samt klimaendringar, havforsuring og langtransportert forureining.

Nyttige innspel

Det var mogeleg for salen å kommentere og stille spørsmål både til presentasjonane og heilt til slutt under paneldebatten. Det kom inn mange nyttige innspel og tankar frå deltakarane, som blir teke med vidare i jobben med å ferdigstille utgreiingsprogramma.