Klima- og forureiningsdirektoratet (dåverande SFT – Statens forureiningstilsyn) melde Vest Tank etter eksplosjonen ved behandlingsanlegget deira for farleg avfall i Gulen i Sogn og Fjordane i 2007.

Trafigura leverte farleg avfall til Vest Tank. Vi melde òg Trafigura fordi vi meinte at importen var i strid med det felles europeiske regelverket for grensekryssande transport av avfall. Men det var ikkje dette avfallet som var på tankane som eksploderte ved Vest Tank.

Legg bort saka mot Trafigura

Økokrim legg no bort saka mot Trafigura og viser til at regelverket om grensekryssande transport av avfall ikkje gjeld. Grunngivinga er at regelverket berre gjeld for avfallstransportar mellom land.

Etterforskinga viste at det farlege avfallet oppstod ved ein avsvovlingsprosess på ope hav utanfor Gibraltar. Det blei frakta med skip direkte til Noreg utan å ha vore innom territoriet til noko anna land.

Brot på forureiningslova

Klima- og forureiningsdirektoratet er einig i at regelverket for grensekryssande transport av avfall berre gjeld for avfallstransportar mellom land. Vi har gjort Økokrim merksam på at Trafigura har brote forureiningsforbodet i forureiningslova ved å levere farleg avfall til ein aktør utan nødvendige løyve.

Vi registrerer at Økokrim ikkje har funne grunnlag for å gå vidare med denne sida av saka.

Endre regelverket internasjonalt

Klima- og forureiningsdirektoratet tek i samarbeid med Miljøverndepartementet initiativ til å styrkje det internasjonale regelverket på dette området. Vi ser no på kva vi kan gjere gjennom internasjonale organisasjonar for å regulere denne typen verksemd.

I mars i år dømde Nordhordland tingrett tidlegare styreleiar og dagleg leiar i Vest Tank til fengsel utan vilkår for fleire brot på forureiningslova. Denne dommen er anka.