Kontrollerer fiskeoppdrett: Målet med aksjonen til forureiningsmyndigheitene er å kontrollere at oppdrettsanlegga følgjer dei miljøkrava dei skal etter forureiningslova, og at dei prioriterer førebyggjande miljøarbeid. Foto: Klima- og forureiningsdirektoratet (Klif)

– Det er viktig at oppdrettsbransjen kjenner miljøansvaret sitt. Regelverket må takast på alvor, slik at det blir så lite forureining som råd er, seier Ellen Hambro, direktør for Klima- og forureiningsdirektoratet.

Nødvendig tilsyn

Eit forprosjekt i fjor viste at det er viktig med auka tilsyn med fiskeoppdrett. Vi har valt ut oppdrettsanlegg med geografisk spreiing i fjordområde der vi veit at miljøtilstanden ikkje er god.

– Vi kontrollerer om fiskeoppdretta rettar seg etter krava i utsleppsløyve og internkontrollforskrifta, slik at dei ikkje forureinar fjordane på ein uakseptabel måte, seier klima- og forureiningsdirektør Ellen Hambro.
Internkontrollforskrifta pålegg bedriftene å arbeide systematisk med risikovurderingar, vedlikehald og kompetanseutvikling.

Tettare oppfølging

Klima- og forureiningsdirektoratet har overfor Miljøverndepartementet tidlegare foreslått å skjerpe miljøregelverket for oppdrettsnæringa. Vi følgjer no bransjen tettare opp med fleire tilsyn.
Alle avvik blir følgde opp, som minimum med eit nytt tilsyn for å sikre at feila blir retta opp.