Ragn-Sells Elektronikkretur AS blei kontrollert av Klima- og forureiningsdirektoratet (Klif) i mai 2010. Kontrollen avdekte omfattande og alvorlege brot på regelverket, og selskapet blei varsla om at Klif tok sikte på å trekkje godkjenninga som returselskap for elektrisk og elektronisk avfall (EE-avfall).

Har gjort ein betydeleg innsats

Sidan kontrollen har selskapet dokumentert at dei har gjort ein stor jobb med å revidere og utvikle nye rutinar og system for retursystemet sitt for å sikre at alvorlege forhold av betydning for miljøet og retursystemet, er retta opp. Direktoratet meiner at forholda no ligg til rette for lovleg drift i selskapet, men at det er nødvendig med dokumentasjon på at det nye systemet blir etterlevd og at det fungerer i praksis.

Ragn-Sells Elektronikkretur AS må sende slik dokumentasjon til Klif innan 1. desember 2010. Klif vil på nytt vurdere å trekkje godkjenninga dersom denne dokumentasjonen viser at selskapet ikkje driv i tråd med regelverket, og vi vil følgje opp selskapet med nye kontrollar.

Miljøverndepartementet har i denne saka valt Jørn Holme som settedirektør for Klima- og forureiningsdirektoratet. Årsaka er at direktør Ellen Hambro har erklært seg inhabil på grunn av vennskapsforholdet sitt til miljøsjefen i det svenske morselskapet Ragn-Sells AB.