Lunde i Barentshavet: Lundefeltet på Tromsøflaket er 78 kilometer frå nærmaste land, Sørøya utanfor Hammerfest.

I forvaltningsplanen for Barentshavet er området definert som særleg verdifullt og sårbart i miljø- og ressurssamanheng. Kartlegginga av området for leitebrønnen har vist at det ikkje er korallar eller svampsamfunn i nærområdet, men det finst sårbare naturressursar lenger unna som kan bli påverka ved ei akutt hending.

Regjeringa har opna området, og lisensen blei tildelt i 2008.

Strengare enn ENI planla

Klif har mellom anna stilt krav om at eventuell akutt forureining skal oppdagast innan ein time.

- Dette kravet er strengare enn det som er lagt til grunn i ENI si beredskapsanalyse, seier avdelingsdirektør Signe Nåmdal i Klima- og forureiningsdirektoratet.

Opptakssystem skal vere på plass innan to timar. Klif har også understreika operatøren si plikt til å ha tilstrekkeleg kompetanse og system for å handtere overvakingsresultat og beredskapsmateriell.

Krav til miljøovervaking

Boringa er planlagt utført i ein periode av året med dårlege lysforhold. Derfor krev direktoratet at ENI Norge må ha rask tilgang til overvakingsutstyr som fungerer godt i mørke.

ENI kan for eksempel oppfylle kravet ved bruk av radar som oppdagar olje på fartøy i kombinasjon med luftboren infraraud overvaking.

Må tilpassast vêrforhold

Danning av is kan vere eit problem, og dette må takast hand om gjennom at ENI Norge i størst mogleg grad nyttar beredskapsfartøy, lekterar for lagring av oppsamla emulsjon og anna beredskapsmateriell som er klargjort for å avgrense nedising.

Klif legg til grunn at leiteaktiviteten tilpassast dersom nedising tilseier at beredskapstiltak ikkje kan settast i verk. Forventa borestart er oktober 2010.