Dei nye krava til sertifisering gjeld for kuldebransjen, bilbransjen, arbeid med brannslukkingssystem og løysemiddel med fluorhaldige gassar samt for høgspentbransjen. Formålet er å redusere utsleppa av klimagassar.

Isovator peika ut som sertifiseringsorgan for handtering av HFK/PFK

Klif har peika ut Isovator som sertifiseringsorgan for personell og bedrifter som har omgang med HFK- og PFK-gassar. Dette gjeld

• kuldebransjen (inkludert varmepumper og luftkondisjonering) 
• bilbransjen (luftkondisjoneringsanlegg i køyretøy)
• arbeid med brannslukkingssystem (sløkkjegassar)
• arbeid med løysemiddel basert på fluorhaldige gassar

INCERT AB skal sertifisere personell som handterer SF6

Klif har peika ut INCERT AB som sertifiseringsorgan for personell i høgspentbransjen (utstyr isolert med SF6).

Krava som blir stilte for dei ulike bransjane, varierer noko. Hovudtrekka er at sertifiseringsorgana skal etablere system for opplæring og sertifisering av personell og bedrifter som utfører tekniske inngrep i anlegg, behandlar avtappa gass og utfører lekkasjeinspeksjonar.

Dei to sertifiseringsorgana skal fastsetje og bruke prosedyrar for utsending, suspendering og inndraging av sertifikat. Vidare skal dei registrere og kontrollere status på sertifikata til sertifiserte personar og føretak.

Sertifiseringsprosessen

Isovator vil arbeide for at sertifiseringssystemet blir etablert så raskt som mogeleg. Ettersom det er svært mange aktørar som handterer HFK og PFK, reknar Klif og Isovator med at det vil ta om lag to år frå systemet er på plass til alle som er kvalifiserte og som ønskjer det har fått moglegheita til å skaffe seg eit sertifikat.

For høgspentbransjen forventar Klif at ordninga vil vere på plass betydeleg raskare.

Sertifiseringsorgana vil arbeide for pragmatiske løysingar i sertifiseringsperioden og vil kome med meir informasjon om dette seinare.

Mindre utslepp av klimagassar

Kombinert med andre krav i regelverket, slik som lekkasjekontroll og merking av anlegg med F-gassar, antar ein at sertifiseringsordninga reduserer utsleppet av klimagassar.

Størst effekt på utsleppa vil truleg kome frå små varmepumper og køyretøy. Enkeltfyllingane her er så små at dagens avgift/refusjon ikkje gir tilstrekkelege insentiv for å handtere gassen på ein forsvarleg måte.

I tillegg blir det ikkje lenger tillate for usertifiserte personar å montere varmepumper med HFK. Kravet om sertifisering forventast også å auke medvitet i bransjen og hos kvar enkelt entreprenør om klima- og miljøeffektane av gassane.