Rein jord gir glade barn: Målet med oppryddinga har vore å redusere den samla miljøgiftbelastninga barn blir utsett for til dagleg. Illustrasjonsfoto: Klif

– Den jobben vi har gjort har vore svært viktig og riktig. Vi har sytt for redusert miljøbelastning for barnehagebarna i 14 utvalgte kommunar, seier avdelingsdirektør Marit Kjeldby i Klima- og forureiningsdirektoratet (Klif).

I Noreg finst det 40 000 leikeplassar, og 6000 av dei er barnehagar. Gjennom prosjektet er i underkant av 2000 av dei antekne mest forureina barnehagane og 60 leikeplassar kartlagt ved å måle forureiningsinnhaldet i overflatejorda, og dokumentere bruken av CCA- og kreosotimpregnert trevirke.

Kartlegginga og påfølgande tiltak med å rydde opp i forureina jord i barnehagar og på leikeplassar i dei ti største byane, og i fire store industrikommunar i Noreg, nærmar seg dermed slutten.

Kommunane sitt ansvar

Nå gjenstår den vidare oppfølginga av barnehagar som ikkje er kartlagde i resten av landet. Det er kommunane sjølve som sit med lokalkunnskap om nåverande og tidlegare arealbruk, og som er best i stand til å gjere dette.

– Kommunane må vurdere kva for barnehagar som er antekne å ha jordforureining utover akseptabelt nivå. Det er kommunane som er lokal helsemyndigheit og forvaltar regelverket om miljøretta helsevern, seier Kjeldby vidare.

Etter kommunehelsetenestelova kan den lokale helsemyndigheita stille krav om undersøkingar. Kommunen må også ta den endelege avgjerda om tiltak er nødvendig. Klif vil bidra med godt rettleiingsmateriell for å gjere kommunane i stand til å undersøkje miljøgiftinnhaldet i barnehagejorda, og vurdere kva for tiltak som må gjennomførast for å sikre trygg barnehagejord.

Vidare oppfølging

Klif meiner det er viktig å følgje opp barnehageprosjektet på to område:

1. Greie ut om og forskriftsfeste ei utfasing av CCA-impregnert trevirke i barnehagar.

• Barnehageprosjektet har avdekka at CCA-impregnert trevirke er den vanlegaste grunnen til forureina jord i barnehagar. Sjå faktaboks om CCA-impregnering.
• Prosjektet har også synt at delen barnehagar med CCA-impregnert trevirke i leikeapparat er høg og relativt lik over heile landet.
• Barn blir eksponert ved at dei får CCA på hendene og sleikjer på stokkane.

2. Gi nødvendig informasjon til kommunane.

• Resultata frå kartleggingane syner at anna forureining av barnehagejord ikkje representerer helsefare for barn på kort sikt, men likevel vil kunne gi ei uønska og unødvendig tilleggseksponering for miljøgifter.
• Denne eksponeringsrisikoen er høgast i tilfelle der barnehagen er gamal, ligg i gamle bustadområde i byar, i område der det har vore bybrannar, mykje industriaktivitet og liknande.
• Kommunar eller private med slike barnehagar må vere særleg merksame på å undersøkje jorda i desse barnehagane. Klif vil derfor syte for at alle kommunar har tilgang til våre rettleiingar om rein barnehagejord og bidra til at kommunane aktivt tar dei i bruk.

Klif ser det ikkje nødvendig å gå vidare med krav om kartlegging av barnehagejorda i alle barnehagane i dei resterande kommunane.