Direktivet forbyr seks helse- og miljøskadelege stoff i vanlege produkt som kjøkkenutstyr, leiker, mobiltelefonar og datamaskiner. Nå har EUs parlamentarikarar blitt einige med EU-kommisjonen om at mange fleire produkt skal vere omfatta av miljøkrava.

Betre vern: Fleire produkt, som blinkeskor, blir nå omfatta av forbodet mot seks av dei farligaste miljøgiftene. Foto: Elretur.

Tryggare og enklare gjenvinning

På den nye lista er blant anna batteriladarar, babyalarmar, blinkeskor, leiker med lyd og lys, skøyteleidningar, og mange andre større produkt som sementblandarar, løftemaskinar og massasjestolar.

- Det er svært viktig å hindre spreiing av helse- og miljøfarlege stoff som kan skade menneske og miljø, og denne reguleringa vil bidra til det, seier Ellen Hambro, direktør for Klima- og forureiningsdirektoratet.

Forbodet gjer gjenvinning og gjenbruk av produkta enklare og tryggare, fordi det blir mindre farlege stoff å handtere. Men reglane har kanskje aller størst effekt for menneske og miljø i utviklingsland, der mykje elektrisk og elektronisk avfall frå Vesten dessverre endar opp – trass i at det er forbode å eksportere slikt avfall dit.

Fjernar tonnevis av gift

RoHS-direktivet krev at alle enkeltkomponent i produkta skal innehalde mindre enn 0,1 prosent av miljøgiftene bly, kvikksølv, seksverdig krom og to grupper av bromerte flammehemmarar, og mindre enn 0,01 prosent kadmium. Utvidinga av direktivet vil blant anna gi 1400 tonn bly og 10 tonn flammehemmarar mindre i den europeiske avfallsstraumen.

Endringane i direktivet vil ta til å verke i EU i løpet av juni, og vil bli tatt inn i norsk regelverk etter ein høringsprosess og når direktivet formelt er kome inn i EØS-avtala.

Produkt som allereie er omfatta av RoHS-direktivet:

• Store hushaldsapparat
• Små hushaldsapparat
• IT- og teleutstyr
• Forbrukarutstyr (brunevarer)
• Belysningsutstyr og lyskjelder
• Elektrisk og elektronisk verktøy (med unntak for  stasjonært industriverktøy i stor skala)
• Leiketøy, fritids- og sportsutstyr
• Salsautomatar

Nye grupper og produkt som vil bli omfatta av RoHS-direktivet:

• Medisinsk utstyr
• Overvakings- og reguleringsinstrument
• Andre produkt som bl.a.: 
  • Elektriske og elektroniske leiker
  • Fødselsdags- og julekort med lyd og lys
  • Pynteting med elektronikk
  • Skøyteleidningar
  • Boblebad
  • Saunaar med elektrisk oppvarming og lys
  • Elektriske tannbørstar
  • Elektriske varmeteppe
  • Elektriske fotbad
  • Speil med lys
  • Blandeverktøy som sementblandarar
  • Elektriske spel
  • Ultralydsapparat, destillasjonsutstyr, sterilisasjonsutstyr
  • Tøy og skor med lys og lyd
  • Skrivarpatronar
  • Heve- og senkebord og -senger
  • Massasjestolar
  • Møbel med lys
  • Mikroskop