Frå 2005 til 2009 er bruken av løysemiddel i bygg- og anleggsbransjen redusert frå ca. 6000 tonn til ca. 2000 tonn årleg – ein nedgang på 67 prosent. Det viser nye tal frå produktregisteret i Klima- og forureiningsdirektoratet (Klif).

Storforbrukarar av kjemikal

Forbetringa skuldast ikkje berre strengare krav til løysemiddelbruk, men også bransjen si generelle plikt til kontinuerleg å vurdere om dei kan bruke meir miljøvennlege alternativ.

– Bygg- og anleggsbransjen er storforbrukar av kjemikal. Vi har hatt ekstra trykk på kontroll, strengare regelverk og informasjon overfor bransjen dei siste åra, og bransjen har teke eit større ansvar. Eg er glad for å sjå at bruken av dei farlegaste stoffa no går kraftig ned, seier Ellen Hambro, direktør for Klima- og forureiningsdirektoratet.

• Les meir: Mindre bruk av dei farligste kjemikala

Nedgang: Bruk av helse- og miljøskadelige stoff fordelt på bruksområde i bygg- og anleggsbransjen. Kjelde: Produktregisteret i Klif

Omfattande krav til bransjen

Byggherrane har eit strengt regelverk å ta omsyn til. Dei skal ha oversikt over kva kjemikal som til eikvar tid blir brukt, og dei har plikt til å vurdere kontinuerleg om kjemikala dei bruker kan bytast ut med meir helse- og miljøvennlege alternativ. Det er også klare krav til miljømessig forsvarleg handtering av farleg avfall. Oppfølginga av dette blir kontrollert av Klif og Fylkesmannen når vi er på tilsyn.