Klare for gjenvinning: Bilvrak blir samla i høgda før opphogging. Foto: Klif

I samarbeid med Klima- og forureiningsdirektoratet (Klif) skal Fylkesmannens miljøvernavdelingar kontrollere behandlingsanlegg for kasserte kjøretøy rundt om i heile landet. Kontrollaksjonen i år er ei vidareføring av tilsvarande aksjon i 2005.

Avfallsbehandling og ressursutnytting

Importørar og produsentar av bilar har ansvar for å drive eit retursystem og sikre at kasserte kjøretøy blir behandla forsvarleg. Dette skal sikre gjenvinning av materiale frå bilvrak, både for å redusere miljøproblem og for å oppnå ei god ressursutnytting.

Biloppsamlingsplassar er sentrale aktørar i arbeidet med sanering og opphogging av kasserte kjøretøy.

– Sanering inneber ein risiko for forureining av omgivnadene. Det er derfor viktig at dei som jobbar med dette er medvitne og utfører arbeidet riktig og i tråd med dei krava vi stiller, seier seksjonssjef Einar Knutsen i Klif.

Viktige miljøkrav til bransjen

Dei viktigaste miljøutfordringane ved behandling av bilvraka, er å

• sikre ei god miljøsanering av bilane slik at miljøfarlege komponentar blir fjerna før den vidare behandlinga i fragmenteringsanlegga
• hinder at det skjer forureining til omgivnader av olje, tungmetall og andre fraksjonar
• sikre at farleg avfall blir levert til godkjente avfallsmottak

Følgjer opp brot

Dersom vi avdekkjer brot på regelverket, vil dette bli følgt opp overfor det enkelte anlegg.

– Tilsyn er med på å sikre at miljøkrava blir følgde. Skulle vi finne brot på regelverket, kan dette medføre bruk av tvangsmulkt for å sikre at forholdet blir retta opp. Ved meir alvorlege brot, vil vi vurdere politimelding, avsluttar Knutsen.