Idyllisk plassert: Kva veit oppdrettsselskapa om eigen miljøpåverknad, og kva gjer dei? Foto: Klima- og forureiningsdirektoratet.

Resultat frå tidlegare aksjonar retta mot oppdrettsnæringa, gjer at Klima- og forureiningsdirektoratet (Klif) no legg opp til ei tettare oppfølging og kontroll av næringa.

– Oppdrettsnæringa er i sterk vekst, og kan følgjeleg føre til auka fare for forureining av fjordsystema i landet. Resultata frå aksjonen i fjor, viste at fiskeoppdrettarane ikkje hadde tilstrekkeleg kunnskap om eigen forureiningsfare, seier Ellen Hambro, direktør for Klif.

Krev betre kontroll av botnforholda

Under årets aksjon vil miljømyndigheitene fokusere på anlegga sitt arbeid for å redusere miljørisiko:

• Oversikt og kunnskap om eigen miljøpåverknad
• Miljøundersøkingar av botnforholda 
• Risikovurderingar
• Miljøtiltak

Miljøarbeidet skal vere strategisk og leiinga si oppfølging vil bli kontrollert.

– Oppdrettarane må vite korleis dei påverkar miljøet rundt anlegga, og dessuten arbeide aktivt og målretta for å redusere miljøfaren. Eit spørsmål dei må stille seg, er om den daglege drifta kan forbetrast slik at utslepp av næringssalt, bruk av miljøfarlege kjemikal og lækjemiddel blir redusert, seier Ellen Hambro.

Miljømyndigheitene oppmodar dermed oppdrettarane til å vere meir medvitne miljøansvaret sitt.

– Dei må arbeide for å redusere risiko for miljøpåverknad på fleire felt enn rømming, avsluttar Ellen Hambro.

Oppdrettsanlegg: Kartet viser eit område med månge oppdrettsanlegg – rundt Stord i Hordaland. Klikk i kartet for meir informasjon og for å vise anlegg i andre område i Noreg.